علق شريف إكرامي، حارس مرمى بيراميدز، عبر حسابه على موقع “X” على قرار لجنة التظلمات الأخير الذي أيد قرار رابطة الأندية باعتبار الزمالك فائزًا بمباراة القمة المنسحب منها الأهلي، ورفض خصم نقاط إضافية من الأخير.

وكتب إكرامي: “قرار لا يحتاج خبير ليكشف عواره، ولا اللائحة محتاجة متخصص علشان يوضح ثغراتها.. المشهد مكشوف والتجميل ما بقاش ينفع.. ارتعاش اللوائح وتفصيل القرارات أصبح جزء أصيل من ثقافة المنظومة وسبب أساسي في تدهورها.. وعشان نقدر نبني منظومة تحترم نفسها وتتطور، ثبات القرار واستقلالية القواعد من أي عوامل خارجية هو حجر الأساس..

“وأضاف: “ووسط الارتباك ده، بيظهر نوع تاني من الخطر، بيظهر ناس بتقبل الظلم والتدليس لما يكون في مصلحتها وبتجتهد في اختراع مبررات عشان تمحي بيها شعورها بالذنب، وده للأسف بيكشف التناقض بين قيّمهم وأفعالهم، بس التبرير عمره ما بيمحي الحقيقة بالعكس ساعات بيعرّيها أكتر خصوصًا لما نكون قدام حالة تدليس واعي ومتعمد، وده أخطر من الكذب، لأنه بيغّلف الباطل بقناع المنطق و يوهمك ان الغلط صح..

“واختتم إكرامي قائلًا: “وكالعادة، هيتحول الجدل من مناقشة قرار مشوّه لتبادل اتهامات، وتخوين، وتشويه كل صوت مختلف، وكأن المشكلة مش في القرار، لكن في اللي بينتقده.. وعموماً الكورة زيها زي الدنيا، قيم الناس الحقيقية بتبان فيها وقت الاختبار.. في النهايه كامل احترامي لكل من اختار ضميره قبل انتمائه لان الحق ما بقاش بيتقال مش عشان الناس نسيته، بس عشان بقوا خايفين يدفعوا تمنه.”

باختصار، انتقد شريف إكرامي بشدة قرار لجنة التظلمات، واصفًا إياه بالمعيب والمكشوف، مؤكدًا أن مثل هذه القرارات المتضاربة تؤدي إلى تدهور المنظومة الكروية، كما أشار إلى خطورة تبرير الأخطاء الواضحة وتقبل الظلم لتحقيق مصالح شخصية أو فئوية.