كشفت الفنانة صابرين عن أنها تعلمت من الفنانة الكبيرة فاتن حمامة أمورا عديدة، أبرزها احترام المواعيد فى كواليس مسلسل ضمير أبلة حكمت، بقولها: "كنا بننكسف جداً إنها كانت بتيجي قبلنا، وكنت براقبها بصورة كبيرة وهي بتشتغل في كل التفاصيل الصغيرة علشان أتعلم منها".

وأضافت: كانت بتبص لناس حواليها معينين تطمن منهم إن أداءها مظبوط من كتر ما كانت بتثق فيها زي الفنانة سميرة عبد العزيز، والفنانة إنعام سالوسة".

وتابعت: كانت فاتن حمامة بتهضم الشخصية مش بتحفظها، ودي كانت حاجة مميزة جداً ليها".

كشفت الفنانة صابرين عن أسوأ قرار اتخذته في حياتها أثناء حلولها ضيفة على قناة CBC بقولها: أكتر حاجة غلط خدتها في حياتي هي إني بعدت عن الغناء وركزت في التمثيل بس، رغم إن ده كان ليه أسباب منها إن في حاجات كتير اتعرضت عليا مهمة جداً زي مسلسل أبو العلا البشري والمخرج محمد فاضل خدني في أكتر من حاجة فما عرفتش مع التصوير اركز في الغنا كمان".

تطرقت الفنانة صابرين إلى طريقة أداء الشخصيات التي تلعبها في مشوارها الفني قائلة: "بقول لنفسى جملة كل ما أنزل أروح أصور دور جديد، وهي اوعي تبقى محترفة خليكي هاوية، علشان أفضل محتفظة بروحي بتاعة زمان، وأبقى نفسى أعمل الدور بتميز زي ما كنت في البدايات، لأني لو بقيت محترفة وواثقة بزيادة في نفسى مش ها أنفذ الدور مظبوط".

أيضاً أضافت صابرين عن دورها في مسلسل مسار إجباري: "دور الأم في العمل كان يبدو بسيطا، ولكن ترك علامة وبصمة مميزة عند الجمهور، فأنا حينما أذهب للتصوير حتى الآن لا أزال أحتفظ بشغفي وكأنى هاوية في بدايتي".

هذا وتستضيف الإعلامية مها الصغير، النجمة صابرين في حلقة خاصة من برنامج "السهرة"، مساء اليوم الإثنين بمناسبة أعياد الربيع وشم النسيم على قناة CBC.